ប្រែសម្រួល : កញ្ញាដាលីស (ស្ត្រេតថែមស៍) ៖ ឥណ្ឌូណេស៊ីកាលពីថ្ងៃព្រហស្បតិ៍ទី៩វិច្ឆិកាបានសម្ពោធកសិដ្ឋានថាមពលពន្លឺព្រះអាទិត្យបណ្តែតទឹកតម្លៃ ១០០ លានដុល្លារ ដែលជាកសិដ្ឋានធំបំផុតនៅអាស៊ីអាគ្នេយ៍ ខណៈដែលប្រទេសនេះស្វែងរកឱកាសកាន់តែច្រើនឡើងក្នុងការផ្លាស់ប្តូរទៅរកថាមពលបៃតងកកើតឡើងវិញ។
កសិដ្ឋានថាមពលពន្លឺព្រះអាទិត្យអណ្តែតទឹកស៊ីរ៉ាតា (Cirata) ដែលរំពឹងផលិតអគ្គិសនីគ្រប់គ្រាន់សម្រាប់ផ្តល់ថាមពលដល់គ្រួសារចំនួន ៥០.០០០ ត្រូវបានសាងសង់នៅលើអាងស្តុកទឹកទំហំ ២០០ ហិកតានៅខេត្តជ្វាខាងលិចស្ថិតនៅចម្ងាយប្រហែល ១៣០ គីឡូម៉ែត្រពីរដ្ឋធានីហ្សាការតា។
ប្រធានាធិបតី ចូកូ វីដូដូ បាននិយាយនៅក្នុងសន្ទរកថាដើម្បីប្រារព្ធពិធីសម្ភោធនោះថា “ថ្ងៃនេះជាថ្ងៃប្រវត្តិសាស្ត្រមួយ ពីព្រោះក្តីសុបិនដ៏ធំរបស់យើងក្នុងការកសាងរោងចក្រថាមពលកកើតឡើងវិញទ្រង់ទ្រាយធំទីបំផុតគឺសម្រេចបានហើយ”។
លោកបាននិយាយថា “យើងអាចសាងសង់កសិដ្ឋានថាមពលពន្លឺព្រះអាទិត្យបណ្តែតទឹកធំបំផុតនៅអាស៊ីអាគ្នេយ៍និងធំជាងគេទីបីក្នុងពិភពលោក។”
គម្រោងនេះជាកិច្ចសហការរវាងក្រុមហ៊ុនអគ្គិសនីជាតិរបស់ឥណ្ឌូនេស៊ី Perusahaan Listrik Negara និងក្រុមហ៊ុនថាមពលកកើតឡើងវិញ Masdar ដែលមានមូលដ្ឋាននៅអាប៊ូដាប៊ី (Abu Dhabi) បានចំណាយពេលបីឆ្នាំដើម្បីបញ្ចប់និងចំណាយអស់ប្រហែល ១០០ លានដុល្លារ។
កសិដ្ឋានថាមពលព្រះអាទិត្យ ដែលទទួលមូលនិធិពីក្រុមហ៊ុន Sumitomo Mitsui Banking Corporation ក្រុមហ៊ុន Societe Generale និងក្រុមហ៊ុន Standard Chartered មានបន្ទះស្រូបពន្លឺព្រះអាទិត្យចំនួន ៣៤០.០០០។
រដ្ឋាភិបាលឥណ្ឌូណេស៊ីបាននិយាយថាខ្លួននឹងព្យាយាមសម្រេចឱ្យបាននូវការបំភាយឧស្ម័នសូន្យត្រឹមឆ្នាំ ២០៦០៕
កសិដ្ឋានថាមពលពន្លឺព្រះអាទិត្យអណ្តែតទឹកស៊ីរ៉ាតារំពឹងផលិតអគ្គិសនីគ្រប់គ្រាន់សម្រាប់ផ្តល់ថាមពលដល់គ្រួសារចំនួន ៥០.០០០
