ប្រែសម្រួលៈបំណង(ស្ត្រេតថែមស៍)៖ យន្តហោះយោធាមីយ៉ាន់ម៉ាមួយបានធ្លាក់ក្នុងអំឡុងពេលប្រយុទ្ធគ្នារវាងយោធានិងក្រុមបះបោរជាតិការ៉េនKNDFនៅក្នុងរដ្ឋកាយ៉ះ( Kayah )ក្បែរព្រំដែនថៃកាលពីថ្ងៃសៅរ៍។
ក្រុមKNDFបានអះអាងថា ខ្លួនបានបាញ់ទម្លាក់យន្តហោះនេះ តែអ្នកនាំពាក្យយោធាបាននិយាយថា យន្តហោះមានបញ្ហាបច្ចេកទេសនិងធ្លាក់ ហើយអ្នកបើកបានលោតឆត្រយោងចេញដោយសុវត្ថិភាព។
ហេតុការណ៍ធ្លាក់យន្តហោះនេះកើតឡើងចំពេលយោធាមីយ៉ាន់ម៉ារងការវាយប្រហារពីក្រុមឧទ្ទាមជាច្រើនកន្លែងនៅតាមព្រំដែនចិននិងថៃ ដោយពួកអ្នកវិភាគសន្តិសុខនិយាយថា វាជាការវាយប្រហារដោយមានការសម្របសម្រួលគ្នាទ្រង់ទ្រាយធំមិនដែលធ្លាប់មានពីមុន។
ប្រធានាធិបតីមីយ៉ាន់ម៉ា កាលពីសប្តាហ៍មុន បានព្រមាននៅចំពោះមុខមេដឹកនាំយោធាកាន់អំណាចថា ប្រទេសប្រឈមនឹងការពុះចែកបើសិនជាយោធាបរាជ័យក្នុងការបង្ក្រាបការបះបោរដោយប្រសិទ្ធភាព។
ជម្លោះក្នុងរដ្ឋសាន(Shan)ជាប់ព្រំដែនចិន បណ្តាលអោយមនុស្សយ៉ាងតិច៥០.០០០នាក់ភៀសខ្លួន ផ្លូវពាណិជ្ជកម្មជាមួយចិនត្រូវកាត់ផ្តាច់ និងទីប្រជុំនិងទីតាំងយោធាជាច្រើនត្រូវពួកឧទ្ទាមវាយដណ្តើមកាន់កាប់។
សម្ពន្ធភាពក្រុមបះបោរជនជាតិភាគតិចមួយ អះអាងថាខ្លួនដណ្តើមកាន់កាប់ទីតាំងយោធាមីយ៉ាន់ម៉ាជាង១០០ ។
ការវាយប្រហារលើទីប្រជុំជនក៏កើតមាននៅតំបន់សាហ្កាំង(Sagaing )នៅមីយ៉ាន់ម៉ាភាគកណ្តាលផងដែរ។
កម្មករនិងអ្នកអ្នករកស៊ីបរទេសរាប់រយនាក់រួមមានថៃនិងវៀតណាម កំពុងជាប់នៅក្នុងការប្រយុទ្ធនៅមីយ៉ាន់ម៉ា ដោយក្រសួងការបរទេសថៃបាននិយាយកាលពីថ្ងៃសៅរ៍ថា ពលរដ្ឋរបស់ខ្លួនប្រមាណ២០០នាក់កំពុងរង់ចាំការជម្លៀសចេញពីតំបន់ព្រំដែននៃរដ្ឋកាយ៉ះ៕
ក្រុមឧទ្ទាមអះអាងថាខ្លួនបាញ់ទម្លាក់យន្តហោះយោធាមីយ៉ាន់ម៉ាកាលពីថ្ងៃសៅរ៍ក្នុងពេលមានការប្រយុទ្ធគ្នាដោយកាំភ្លើងយន្ត និងសមាជិករបស់ខ្លួនកំពុងតាមស្វែងរកអ្នកបើកយន្តហោះ