ប្រែសម្រួលៈបំណង(ដេល្លីម៉េល)៖ក្នុងអំឡុងជំនួបមួយនៅសេតវិមានកាលពីថ្ងៃចន្ទ ប្រធានាធិបតីឥណ្ឌូនេស៊ីលោក ចូកូ វីដូដូ បានជំរុញអោយសមភាគីអាម៉េរិកលោក ចូ បៃដិន ធ្វើកិច្ចការច្រើនថែមទៀតដើម្បីបញ្ចប់«អំពើព្រៃផ្សៃ»នៅហ្កាហ្សានិងជួយបង្កើតអោយមានកិច្ចព្រមព្រៀងឈប់បាញ់មួយនៅទីនោះ។
បញ្ហាសង្គ្រាមរវាងអ៊ីស្រាអែលនិងហាម៉ាស បានគ្រប់ដណ្តប់លើរបៀបវារៈនៃកិច្ចប្រជុំរវាងមេដឹកនាំទាំងពីរ។
វីដូដូ មេដឹកនាំប្រទេសមានអ្នកកាន់សាសនាអ៊ីស្លាមច្រើនបំផុតក្នុងលោក បាននិយាយថា «ឥណ្ឌូនេស៊ីអំពាវនាវអោយអាម៉េរិកធ្វើការងារច្រើនថែមទៀតដើម្បីបញ្ចប់អំពើព្រៃផ្សៃនៅហ្កាហ្សា» ហើយ»ត្រូវតែមានបទឈប់បាញ់មួយដើម្បីជាប្រយោជន៍មនុស្សធម៌»។
លោកវីដូដូ បាននិយាយកាលពីថ្ងៃអាទិត្យថា លោកនឹងនាំទៅអោយលោកបៃដិននូវ«សារខ្លាំងណាស់»មួយពីជំនួបកំពូលអារ៉ាប់និងពីក្រុមមេដឹកនាំអ៊ីស្លាមនៅទីក្រុងរីយ៉ាដកាលពីចុងសប្តាហ៍ ដែលពួកគេបានថ្កោលទោសអ៊ីស្រាអែលនិងសុំអោយមានបទឈប់បាញ់មួយឡើង។
លោកក៏បាននិយាយថា លោកនឹង«បញ្ជូនសារជាក់លាក់មួយពីប្រធានាធិបតីប៉ាឡេស្ទីនលោក ម៉ាមូដ អាប់បាស់ ដែលបានសុំអោយខ្ញុំបញ្ជូនវាទៅកាន់ប្រធានាធិបតីបៃដិន »ពាក់ព័ន្ធនឹងសង្គ្រាមនេះ។
តែលោកបៃដិននៅតែផ្តោតលើកិច្ចសហការជាមួយឥណ្ឌូនេស៊ីដែលទើបកែប្រែថ្មីអោយឈានឡើងដល់កំរិតខ្ពស់បំផុត គឺភាពជាដៃគូយុទ្ធសាស្ត្រគ្រប់ជ្រុងជ្រោយមួយ។លោកបៃដិនបាននិយាយថា «ជំនួបនេះកត់សំគាល់យុគថ្មីមួយនៃទំនាក់ទំនងរវាងប្រទេសទាំងពីរ អាម៉េរិកនិងឥណ្ឌូនេស៊ីនៅគ្រប់វិស័យ»។
មេដឹកនាំទាំងពីរក៏បានពិភាក្សាអំពីវត្ថុធាតុសំខាន់បាំបាច់សំរាប់ផលិតអាគុយរថយន្តអគ្គិសនី និងបច្ចេកវិទ្យាថាមពលបៃតងផ្សេងៗ ដែលឥណ្ឌូនេស៊ីមានប្រភពធនធានរ៉ែទាំងនេះយ៉ាងច្រើនសម្បើម។
ក្រោយកិច្ចពិភាក្សានៅវិមានពងក្រពើ មេដឹកនាំទាំងពីរត្រូវទទួលទានទឹកតែនៅបន្ទប់គណៈរដ្ឋមន្ត្រីសេតវិមាន អមដោយជំនួយការរបស់ពួកលោក។
បៃដិន និង វីដូដូ ជួបពិភាក្សានៅសេតវិមានកាលពីថ្ងៃចន្ទ
ជំនួបនេះធ្វើឡើងពីរថ្ងៃមុនលោកបៃដិនជួបពិភាក្សាជាមួយប្រធានាធិបតីចិន ស៊ី ជីនពីង នៅក្រៅជំនួបកំពូលAPECនៅទីក្រុងសាន់ ហ្វ្រានស៊ីស្កូ ។រដ្ឋាភិបាលទីក្រុងវ៉ាស៊ីនតោននិងប៉េកាំង កំពុងសង្ឃឹមថានឹងធ្វើអោយទំនាក់ទំនងរបស់គេមានស្ថិរភាពឡើងវិញ ចំពេលមានការប្រកួតប្រជែងគ្នាយ៉ាងតានតឹងក្នុងការបង្កើតសម្ពន្ធភាពនៃក្រុមប្រទេសដែលមានចិត្តគំនិតដូចគ្នា៕