ប្រែសម្រួល : កញ្ញាដាលីស (ដេល្លីម៉េល) ៖ ការវិភាគថ្មីមួយបានរកឃើញថា ការបំភាយកាបូនរបស់ចិនទំនងជានឹងធ្លាក់ចុះក្នុងឆ្នាំ ២០២៤ ពីព្រោះការកើនឡើងសមត្ថភាពថាមពលកកើតឡើងវិញដល់ចំនួនកំណត់ត្រាឥឡូវនេះគឺគ្រប់គ្រាន់ដើម្បីគ្របដណ្តប់តម្រូវការដែលកំពុងកើនឡើងបានហើយ។
ចិនគឺជាប្រទេសបញ្ចេញឧស្ម័នផ្ទះកញ្ចក់ធំបំផុតរបស់ពិភពលោក ហើយបានច្រានចោលការអំពាវនាវឱ្យមានគោលដៅអព្យាក្រឹតភាពកាបូនដែលមានមហិច្ឆតាជាងគោលដៅបច្ចុប្បន្នរបស់ខ្លួនក្នុងឆ្នាំ ២០៦០។
ទីភ្នាក់ងារថាមពលអន្តរជាតិនិយាយថា ប្រទេសនេះត្រូវបានព្យាករណ៍ថានឹងមាន ៤៥ ភាគរយនៃការបំភាយឧស្ម័នសកលពីទ្រព្យសកម្មឥន្ធនៈហ្វូស៊ីលដែលមានស្រាប់នៅចន្លោះឆ្នាំ ២០២៣ និង ២០៥០។
ប៉ុន្តែចិនក៏បាននិងកំពុងដំឡើងសមត្ថភាពថាមពលកកើតឡើងវិញក្នុងល្បឿនដូចភ្លេចបន្ទោរផងដែរ ដោយថាមពលព្រះអាទិត្យថ្មីក្នុងឆ្នាំ ២០២៣ តែឯងគឺស្មើនឹងពីរដងនៃសមត្ថភាពដំឡើងទាំងមូលនៅក្នុងសហរដ្ឋអាម៉េរិក នោះបើយោងតាមការវិភាគដែលបានចេញផ្សាយកាលពីថ្ងៃចន្ទដោយវេបសាយអាកាសធាតុដែលមានមូលដ្ឋាននៅចក្រភពអង់គ្លេស Carbon Brief។
របាយការណ៍របស់លោក ឡូរី មីលលីវៀតា (Lauri Myllyvirta) មកពីមជ្ឈមណ្ឌលស្រាវជ្រាវថាមពលនិងខ្យល់អាកាសស្អាត បានឱ្យដឹងថា “ការដំឡើងថ្មីនូវថាមពលពន្លឺព្រះអាទិត្យ ខ្យល់ វារីអគ្គិសនី និងនុយក្លេអ៊ែរ ដែលបានបន្ថែមក្នុងឆ្នាំ ២០២៣ តែឯង នឹងបង្កើតថាមពលបានប្រហែល ៤២៣ តេរ៉ាវ៉ាត់ម៉ោង (TWh) ក្នុងមួយឆ្នាំ ស្មើនឹងការប្រើប្រាស់អគ្គិសនីសរុបទូទាំងប្រទេសបារាំង” ។
ការកើនឡើងដ៏ធំនៅក្នុងការដំឡើង និងការស្ទុះងើបឡើងវិញនៃការបង្កើតវារីអគ្គិសនីដែលរំពឹងទុកនៅពេលដែលគ្រោះរាំងស្ងួតបានស្រកចុះ និងការបំពេញអាងស្តុកទឹក “គឺអាចធានានូវការរុញការផលិតអគ្គិសនីពីហ្វូស៊ីលនិងការបំភាយឧស្ម័ន CO2 ឱ្យធ្លាក់ចុះក្នុងឆ្នាំ ២០២៤”។
ការវិភាគនេះអះអាងថា ការធ្លាក់ចុះបែបនោះគឺអាចទៀងទាត់ ដោយសារតែ “អត្រានៃការពង្រីកថាមពលកាបូនទាបឥឡូវនេះគឺគ្រប់គ្រាន់មិនត្រឹមតែអាចបំពេញកំណើនប្រចាំឆ្នាំជាមធ្យមនៃតម្រូវការអគ្គិសនីរបស់ប្រទេសចិនទាំងមូលប៉ុណ្ណោះទេ តែថែមទាំងលើសការរំពឹងទុកទៀតផង”។
របាយការណ៍នេះគឺផ្អែកតាមតួលេខផ្លូវការនិងទិន្នន័យពាណិជ្ជកម្ម។
ទោះជាយ៉ាងណាក៏ដោយ ចិននៅតែបន្តពង្រីកសមត្ថភាពថាមពលធ្យូងថ្មរបស់ខ្លួន ហើយរបាយការណ៍នេះបានព្រមានថា រឿងនេះកំពុងតែ “រៀបចំឆាកសម្រាប់ការប្រឈមមុខដាក់គ្នារវាងក្រុមប្រពៃណីនិងក្រុមផលប្រយោជន៍ថ្មីរបស់ប្រទេសនេះ។”
វេបសាយ Carbon Brief បាននិយាយថា កំណើនថាមពលកកើតឡើងវិញ “គំរាមកំហែងដល់ផលប្រយោជន៍នៃឧស្សាហកម្មធ្យូងថ្មនិងរដ្ឋាភិបាលក្នុងតំបន់ ជាមួយនឹងហានិភ័យខ្ពស់ចំពោះវិស័យធ្យូងថ្ម។”
“ភាគីពាក់ព័ន្ធទាំងនេះអាចត្រូវគេរំពឹងថានឹងតវ៉ានឹងការផ្លាស់ប្តូរនេះ ដោយបង្កើនការព្រួយបារម្ភអំពីលទ្ធភាពបង្កការរំខានដ៏ធំ”។
មន្ត្រីអាកាសធាតុចិននិងអាម៉េរិកបានជួបប្រជុំគ្នានៅដើមសប្តាហ៍នេះសម្រាប់កិច្ចពិភាក្សាមុនកិច្ចប្រជុំ COP28 ក្នុងខែនេះ ដោយភាគីទាំងពីរបានសរសើរកិច្ចពិភាក្សាប្រកបដោយការស្ថាបនា ដោយមិនផ្តល់ព័ត៌មានលម្អិតនោះទេ៕
ចិនកំពុងដំឡើងសមត្ថភាពថាមពលកកើតឡើងវិញក្នុងល្បឿនដូចភ្លេចបន្ទោរ