ដោយ៖ សុវណ្ណកុម្ភៈ / ភ្នំពេញ៖ នៅថ្ងៃទី ១៤ វិច្ឆិកា ម្សិលមិញនេះ សម្ដេចពិជ័យសេនា ទៀ បាញ់ ប្រធានគណៈកម្មាធិការជាតិរៀបចំស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ បាននាំយកថវិការបស់ សម្ដេចអគ្គមហាសេបតីតេជោ ហ៊ុន សែន និង សម្ដេចកិត្តិព្រឹត្តបណ្ឌិត ប៊ុន រ៉ានី ហ៊ុន សែន ជូនដល់កីឡាករ កីឡាការិនី ម្ចាស់មេដាយ មាស ប្រាក់ និងសំរឹទ្ធ ដែលដណ្តើមបាន ក្នុងព្រឹត្តិការណ៍កីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣។
នេះជាប្រាក់រង្វាន់ លើកទឹកចិត្តបន្ថែមរបស់ សម្តេចតេជោ និងសម្តេចកិត្តិព្រឹទ្ធបណ្ឌិត ដល់កីឡាករ កីឡាការិនី ជ័យលាភី ពីការប្រកួតទាំងពីរ គឺ SEA Games-ASEAN Para Games ឆ្នាំ២០២៣ ដែលកម្ពុជាធ្វើជាម្ចាស់ផ្ទះ ជាមួយទំហំទឹក ប្រាក់ សរុបសម្រាប់កីឡាករ កីឡាការិនី SEA Gams ចំនួន ២៣.៣៤៣.៦០០ .០០០ រៀល ដែលមានកីឡាករ កីឡាការិនី ជ័យលាភី ចំនួន ៦១០ នាក់ ដណ្តើមបាន មេដាយមាស ចំនួន ៨១ មេដាយប្រាក់ ចំនួន ៧៤ មេដាយសំរឹទ្ធ ចំនួន ១២៧ សរុប ២៨២ មេដាយ និងកីឡាករ កីឡាការិនី មានពិការភាព ទឹកប្រាក់សរុបចំនួន ៤.៧៩១.៣០០.០០០ រៀល ដែលមានកីឡាករ កីឡាការិនី មានពិការភាពជ័យលាភី ចំនួន ១៤៨ នាក់ ដណ្តើមបានមេដាយមាសចំនួន៩ មេដាយប្រាក់ចំនួន ១៩ មេដាយសំរឹទ្ធចំនួន ៤៥ សរុប ៧៣ មេដាយ។
ចំពោះ កីឡាករ កីឡាការិនីជ័យលាភីមួយចំនួន ជាកូនខ្មែរ នៅក្រៅប្រទេស និងមួយ ចំនួនទៀត កំពុងហ្វឹកហាត់នៅប្រទេសចិន មិនបានចូលរួមទទួលផ្ទាល់ នាពេលនេះទេ ប៉ុន្តែគណៈកម្មការហិរញ្ញវត្ថុ នឹងចាត់ចែងផ្ញើជូន តាមនីតិវិធីដែលមានសុវត្ថិភាពបំផុត៕/V/r
