ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីអាម៉េរិក ចូ បៃដិន បានធានាឡើងវិញដល់បណ្តាប្រទេសមានសេដ្ឋកិច្ចលូតលាស់នៅតំបន់អាស៊ីប៉ាស៊ីហ្វិកអំពីការប្តេជ្ញាចិត្តរបស់អាម៉េរិកនៅក្នុងកិច្ចប្រជុំកំពូលនៅទីក្រុងសាន់ហ្វ្រាន់ស៊ីស្កូកាលពីថ្ងៃព្រហស្បតិ៍ ហើយបាននិយាយថា កិច្ចពិភាក្សារបស់គាត់ជាមួយមេដឹកនាំចិនស៊ី ជីនពីងនឹងផ្តល់នូវស្ថិរភាពសម្រាប់តំបន់និងពិភពលោកទាំងមូល។
បៃដិនឡើងថ្លែងបើកជំនួបកំពូលAPECនៅក្រុងសាន់ហ្វ្រានស៊ីស្កូ
លោកបៃដិនបានប្រាប់ក្រុម APEC (កិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក) ដែលមានសមាជិកចំនួន ២១ យ៉ាងដូច្នេះថា “យើងមិនទៅណាទេ។”
កិច្ចប្រជុំកំពូលនេះបានបើកជាមួយនឹងអារម្មណ៍ធូរស្រាល បន្ទាប់ពីលោកបៃដិននិងលោកស៊ីបានជួបគ្នាជាលើកដំបូងក្នុងរយៈពេលមួយឆ្នាំនៅឯផ្ទះវីឡាដ៏ប្រណីតមួយនៅខាងក្រៅទីក្រុងសាន់ហ្វ្រាន់ស៊ីស្កូកាលពីថ្ងៃពុធ ហើយបានលេចចេញនូវការសន្យាថានឹងបញ្ចៀសការប្រេះឆាដ៏គ្រោះថ្នាក់ ដែលអាចប៉ះពាល់ដល់សេដ្ឋកិច្ចពិភពលោក។
មេដឹកទាំងពីរបានយល់ព្រមស្តារទំនាក់ទំនងរវាងយោធានិងយោធាឡើងវិញហើយលោកស៊ីបានសន្យាថានឹងបង្ក្រាបការផលិតសារធាតុផ្សំនៅក្នុងប្រទេសចិនសម្រាប់ថ្នាំញៀនដែលជន់លិចពេញសហរដ្ឋអាម៉េរិក។
លោកបៃដិនបានប្រាប់កិច្ចប្រជុំកំពូល APECថា រដ្ឋាភិបាលក្រុងវ៉ាស៊ីនតោនបានប្តេជ្ញាចិត្តចំពោះតំបន់នេះ ត្បិតរដ្ឋាភិបាលក្រុងប៉េកាំងកំពុងខិតខំប្រឹងប្រែងពង្រីកឥទ្ធិពលរបស់ខ្លួននៅក្នុងតំបន់ក៏ដោយ។
ប្រធានាធិបតីអាម៉េរិកបាននិយាយថា លោកស៊ីបានសួរគាត់កាលពីថ្ងៃពុធថា “ហេតុអ្វីបានជាយើងចូលរួមពាក់ព័ន្ធក្នុងតំបន់ប៉ាស៊ីហ្វិកម្ល៉េះ?”។
លោកបៃដិនបាននិយាយថា “ខ្ញុំបាននិយាយថា វាគឺដោយសារតែយើងជាប្រជាជាតិប៉ាស៊ីហ្វិក។ ដោយសារតែបានពួកយើង ទើបមានសន្តិភាពនិងសន្តិសុខនៅក្នុងតំបន់ ដែលអនុញ្ញាតឱ្យអ្នករីកចម្រើន។ គាត់មិនបានបដិសេធនោះទេ”៕
លោកបៃដិននិងលោកស៊ីជួបគ្នានៅសាន់ហ្វ្រាន់ស៊ីស្កូកាលពីថ្ងៃពុធ