ប្រែសម្រួលៈបំណង(ដេល្លីម៉េល)៖ជម្លោះការទូតរវាងចិននិងកាណាដានៅបន្តទៅមុខកាលពីថ្ងៃចន្ទទី២០វិច្ឆិកាក្រោយបុរសកាណាដាម្នាក់ក្នុងចំណោមជនជាតិកាណាដាពីរនាក់ដែលបានជាប់គុកក្នុងប្រទេសចិនអស់បីឆ្នាំបានអះអាងថា ខ្លួនត្រូវបានគេប្រើអោយប្រមូលព័ត៌មាននៅចិន និងកំពុងទាមទារសំណងជំងឺចិត្តពីរដ្ឋាភិបាលទីក្រុងអូតាវ៉ា។
ការចាប់ឃុំខ្លួននៅឆ្នាំ២០១៨និង២០២១លើបុរសកាណាដា មីកែល ស្ពេវឺ(Michael Spavor)និងលោក មីកែល កូវរីក(Michael Kovrig)បានធ្វើអោយទំនាក់ទំនងទ្វេភាគីរវាងចិននិងកាណាដាធ្លាក់ចុះជាខ្លាំង។
លោកស្ពេវឺ ឥឡូវបន្ទោស កូវរីក ចំពោះការជាប់គុករបស់គេ ដោយសារតែការផ្តល់ព័ត៌មានអំពីកូរ៉េខាងជើង ដោយមិនដឹងថាវាត្រូវបានចែលរំលែកទៅអោយកាណាដានិងដៃគូចារកម្មរបស់រដ្ឋាភិបាលទីក្រុងអូតាវ៉ា ។បុរសនេះកំពុងទាមទារសំណងជំងឺចិត្តរាប់លានដុល្លារពីរដ្ឋាភិបាលទីក្រុងអូតាវ៉ា នេះបើតាមការផ្សាយរបស់សារព័ត៌មាន Globe and Mail ។
ទោះជាយ៉ាងណា កូវរីកបានប្រាប់ទីភ្នាក់ងារសារព័ត៌មានបារាំងថា «ការចោទប្រកាន់មិនមានមូលដ្ឋានការពិត»ទេ។
មេធាវីរបស់ស្ពេវឺ បានបដិសេធមិននិយាយនៅពេលក្រសួងការបរទេសកាណាដាបាននិយាយយោងដល់សម្តីរបស់នាយករដ្ឋមន្ត្រីកាណាដាលោក ចាស្ទីន ទ្រូដូកាលពីឆ្នាំ២០២១ដែលបានហៅការចោទប្រកាន់ពីបទចារកម្មនេះថា«មិនមានមូលដ្ឋានការពិត»។
ទោះជាយ៉ាងណា ស្ថានទូតចិនប្រចាំទីក្រុងអូតាវ៉ា បាននិយាយនៅក្នុងសេចក្តីថ្លែងការណ៍មួយថា ការអះអាងរបស់ស្ពេវឺ «បង្ហាញការលាក់ពុតរបស់កាណាដាទាំងស្រុង»។
វាបាននិយាយថា« ការខិតខំនិយាយបំប៉ោងរបស់កាណាដាអំពីអ្វីដែលហៅថា “ការចាប់ឃុំខ្លួនតាមអំពើចិត្ត”ដោយអាជ្ញាធរចិន គឺពិតជាចោរស្រែកអោយចាប់ចោរមែន»។
ក្នុងអំឡុងពេលត្រូវឃុំខ្លួនអ្នកទាំងពីរ រដ្ឋាភិបាលទីក្រុងអូតាវ៉ាបានច្រានចោលការចោទប្រកាន់ចារកម្មប្រឆាំងពួកគេ និងបានចោទប្រកាន់រដ្ឋាភិបាលទីក្រុងប៉េកាំងថាចាប់ឃុំខ្លួនមនុស្សតាមអំពើចិត្តដើម្បីជាការសងសឹកការដែលកាណាដាចាប់ខ្លួននាយកប្រតិបត្តិក្រុមហ៊ុនHuawei លោកស្រី ម៉េង វ៉ាន់ចូវ(Meng Wanzhou)តាមដីការបស់អាម៉េរិក។
អ្នកទាំងបីត្រូវបានដោះលែងកាលពីខែកញ្ញា ឆ្នាំ២០២១។
កាលពីថ្ងៃចន្ទរដ្ឋាភិបាលទីក្រុងអូតាវ៉ានៅតែអះអាងអំពីភាពគ្មានទោសរបស់បុរសកាណាដាទាំងពីរ និងបាននិយាយនៅក្នុងសេចក្តីថ្លែងការណ៍មួយថា« ការបន្តការគិតថា មីកែលជាប់ពាក់ព័ន្ធនឹងការធ្វើចារកម្ម គឺគ្រាន់តែជាបន្តរឿងនិទានមិនពិតមួយ»។
បញ្ជាក់ថា ស្ពេវឺ បានរស់នៅចិនជិតព្រំដែនកូរ៉េខាងជើង និងបានស្ថិតក្នុងចំណោមជនលោកខាងលិចតិចតួចបំផុតដែលបានជួបមេដឹកនាំកូរ៉េខាងជើង គីម ជុងអ៊ុន។គាត់បើកក្រុមហ៊ុនទេសចរណ៍មួយ ដោយបានជួយរៀបចំដំណើរទស្សនកិច្ចមួយចំនួន រួមមានដំណើររបស់តារាបាល់បោះ ដេននីស រ៉ូដមែន(Dennis Rodman )ទៅកាន់ប្រទេសឯកោនេះផង។
ចំណែក កូវរីក បានធ្វើជាអ្នកការទូតនៅក្រុងប៉េកាំងចាប់ពីឆ្នាំ២០១២ ដល់២០១៤ ហើយមានភារកិច្ចប្រមូលព័ត៌មានស្តីពីសន្តិសុខនិងស្ថិរភាពនៅចិន។លោកបានចាកចេញពីការងារទូតនិងបានកំពុងធ្វើការនៅអង្គការហុងកុងមួយពេលត្រូវបានចាប់ខ្លួននៅចិន៕
មីកែល កូវរីក(កណ្តាល)និងមីកែល ស្ពេវឺ បង្ហាញខ្លួនក្នុងសភាកាណាដាកាលពីខែមីនាឆ្នាំ២០២៣