ប្រែសម្រួល : កញ្ញាដាលីស (ដេល្លីម៉េល) ៖ ប្រធានាធិបតីអាម៉េរិកលោក ចូ បៃដិន បាននិយាយកាលពីថ្ងៃចន្ទថា លោកជឿថាកិច្ចព្រមព្រៀងដោះលែងចំណាប់ខ្មាំងនៅតំបន់ហ្កាហ្សាគឺជិតមកដល់ហើយ ខណៈក្តីសង្ឃឹមបានកើនឡើងសម្រាប់កិច្ចព្រមព្រៀងដែលសម្របសម្រួលដោយកាតាដើម្បីដោះលែងអ្នកជាប់ឃុំមួយចំនួនជាថ្នូរនឹងការផ្អាកការប្រយុទ្ធ។
នៅពេលគេសួរថាតើកិច្ចព្រមព្រៀងដោះលែងចំណាប់ខ្មាំងជិតមកដល់ហើយឬនៅ លោកបៃដិន ដែលកំពុងចូលរួមក្នុងពិធីលើកលែងទោសដល់មាន់ទោ សម្រាប់ពិធីបុណ្យស៊ែងហ្គីវវីង (Thanksgiving) នៅសេតវិមាន បាននិយាយថា “ខ្ញុំជឿដូច្នេះ”។
បន្ទាប់មក លោកបៃដិនបានលើកម្រាមដៃខ្វែងដើម្បីជាសញ្ញាថា គាត់សង្ឃឹមថានឹងមានសំណាងល្អ។
នាយករដ្ឋមន្ត្រីកាតាបាននិយាយកាលពីថ្ងៃអាទិត្យថា កិច្ចព្រមព្រៀងមួយដើម្បីដោះលែងចំណាប់ខ្មាំងចំនួន ២៤០ នាក់ ដែលក្រុមហាម៉ាសបានចាប់ក្នុងការវាយប្រហារកាលពីថ្ងៃទី ៧ ខែតុលាលើអ៊ីស្រាអែលជាថ្នូរនឹងបទឈប់បាញ់បណ្តោះអាសន្ន ឥឡូវនេះគឺពឹងលើបញ្ហាអនុវត្តជាក់ស្តែង “តូចតាច” ប៉ុណ្ណោះ។
សេតវិមានបាននិយាយថា ការចរចាគឺស្ថិតក្នុងដំណាក់កាល “ចុងបញ្ចប់ហើយ” ប៉ុន្តែបដិសេធមិនផ្តល់ព័ត៌មានលម្អិតបន្ថែមទៀតទេ ដោយនិយាយថាវាអាចប៉ះពាល់ដល់លទ្ធផលជោគជ័យ។
អ្នកនាំពាក្យក្រុមប្រឹក្សាសន្តិសុខជាតិ លោក ចន ឃឺប៊ី (John Kirby) បានប្រាប់អ្នកយកព័ត៌មានថា “យើងជឿថា យើងជិតសម្រេចជោគជ័យជាងអ្វីដែលយើងបានរំពឹង ដូច្នេះយើងមានសង្ឃឹម។”
“ប៉ុន្តែនៅតែមានការងារត្រូវធ្វើទៀត។ ហើយគ្មានអ្វីត្រូវបានធ្វើបាននៅឡើយទេរហូតដល់វារួចរាល់អស់សិន។ ដូច្នេះយើងនឹងបន្តធ្វើការលើរឿងនេះ។”
លោកកឺប៊ីបានបន្ថែមថា ការរៀបចំនានានៅកំពុងធ្វើឡើងនៅគ្រប់ភាគីទាំងអស់។
លោកបាននិយាយថា “នៅពេលអ្នកចាប់ផ្តើម អ្នកនឹងអាចជឿបានថាមនុស្សគ្រប់គ្នានឹងបំពេញតាមការសន្យារបស់ពួកគេ។ ហើយនោះជាអ្វីដែលយើងកំពុងធ្វើ។”
កាសែត Washington Post បានរាយការណ៍កាលពីថ្ងៃសៅរ៍ថាមានកិច្ចព្រមព្រៀងបណ្តោះអាសន្នមួយដើម្បីដោះលែងស្ត្រីនិងកុមាររាប់សិបនាក់ ដែលជាប់ជាចំណាប់ខ្មាំងនៅហ្គាហ្សា ជាថ្នូរនឹងការផ្អាកប្រយុទ្ធគ្នា៥ថ្ងៃ៕
លោកបៃដិនលើកម្រាមដៃខ្វែងបង្ហាញថាគាត់សង្ឃឹមមានសំណាងល្អ