ដោយៈ ភ្នំស្វាយ / បន្ទាយមានជ័យៈ លោក លី សុវណ្ណារឹទ្ធិ អភិបាលស្តីទី លោកឈឿន ក្រៃយ៉ុង អភិបាលរងខេត្ត និងជាប្រធានគណៈកម្មការដឹកនាំទូក ទៅប្រកួត លោក រ័ត្ន ដាស៊ីណង់ អភិបាលស្រុកមង្គលបូរី និងអ្នកពាក់ព័ន្ធ បានអញ្ជើញក្នុងពិធីចម្រើនព្រះបរិត្ត ណែនាំចំណុះទូកនិងសែនក្រុងពាលីទូកឈ្មោះ “សុវណ្ណរាជសី បារមីបន្ទាយមហានគរ” ចំណុះ ៧៤ នាក់ ដែលជាប់ចំណាត់ថ្នាក់លេខ១ ក្នុងការប្រណាំងនៅក្នុងខេត្តបន្ទាយមាន ជ័យ កាលពីថ្ងៃទី ១១-១២ ខែវិច្ឆិកា កន្លងមក ហើយនឹងត្រូវធ្វើដំណើរ នាថ្ងៃទី ២១ ខែវិច្ឆិកា ឆ្នាំ២០២៣ ទៅរាជធានីភ្នំពេញ ដើម្បីត្រៀមប្រកួតថ្នាក់ជាតិ។ នេះបើយោងមន្ត្រី រដ្ឋបាលស្រុកមង្គលបូរី បានអោយដឹងនៅរសៀលថ្ងៃទី ២០ ខែវិច្ឆិកា ឆ្នាំ២០២៣ នេះ ។
លោក អភិបាលស្រុកមង្គលបូរី បានអោយដឹងថា លោកធ្លាប់បានដឹកនាំចំណុះទូក និង ទូកជ័យលាភីលេខ១ របស់ខេត្ត ដែលមានឈ្មោះនៃវត្តខាងលើ ទៅប្រកួតថ្នាក់ជាតិ នៅភ្នំពេញ ។
លោក ឈឿន ក្រៃយ៉ុង អភិបាលរងខេត្តបន្ទាយមានជ័យ និងជាប្រធានក្រុមដឹកនាំទូក ចំណាត់ថ្នាក់លេខ១ ខេត្ត ទៅប្រកួតថ្នាក់ជាតិ នាឆ្នាំនេះ និងលោក លី សុវណ្ណារឹទ្ធិ អភិបាលស្តីទីខេត្តបន្ទាយមានជ័យ បាននិយាយថា ចំណុះទូកខ្លះចាស់ ខ្លះថ្មី ប៉ុន្តែចាំបាច់ ត្រូវគោរពបទបញ្ជាផ្ទៃក្នុង និងលក្ខន្តិកៈរបស់ គណ:កម្មការជាតិរៀបចំប្រណាំងទូក ។
ក្នុងនោះ មានការហាមយកអ្នកក្រៅក្រុមការងារ ឬមិនពាក់ព័ន្ធតាម ហាមយកសត្វចិញ្ចឹម តាម ។ ចំណុះទូកទាំង ២ ប្រភេទ និងមេក្រុមទូក ត្រូវថែទាំសុខភាព រក្សាកម្លាំង និងឆន្ទៈ ជាមួយភាពស្មោះត្រង់ ដើម្បីប្រកួត រក្សាសាមគ្គី ឯកភាព និងគោរពវិន័យ គោរពការណែ នាំរបស់ប្រធានក្រុមដឹកនាំ ដើម្បីដណ្តើមប្រៀបឈ្នះ នាំជ័យជម្នះមកឱ្យទូក ក៏ដូចជាដើម្បី កិត្តិយសរបស់ទូកខ្លួន វត្ត ភូមិ ឃុំស្រុក ជាពិសេសជូនរដ្ឋបាលខេត្តបន្ទាយមានជ័យ។
សូមរំលឹកថា កាលពីថ្ងៃទី ១១-១២ ខែវិច្ឆិកា ឆ្នាំ២០២៣ រដ្ឋបាលខេត្តបន្ទាយមានជ័យបានរៀបចំការប្រណាំងទូក ង ថ្នាក់ខេត្ច មានចំនួន ២៨ ទូក អបអរសាទរព្រះរាជពិធី បុណ្យអុំទូក បណ្តែតប្រទីប អកអំបុក និងសំពះព្រះខែ នៅដងស្ទឹងសិរីសោភ័ណ នាក្រោយសាកលវិទ្យាល័យជាតិមានជ័យ ក្នុងសង្កាត់ទឹកថ្លា ក្រុងសិរីសោភ័ណ ។
ជាលទ្ធផល គឺទូកចំណុះ ៦៥-៧៥ នាក់ លេខ១ បានទៅទូកឈ្មោះ សុវណ្ណរាជសី បារមីបន្ទាយមហានគរ មកពីវត្តសុវណ្ណរង្សីយារាម ហៅវត្តគយម៉ែង នៅឃុំគយម៉ែង ស្រុកមង្គលបូរី ហើយត្រូវទៅប្រកួតបន្ត នៅថ្នាក់ជាតិ នារាជធានីភ្នំពេញទៀត ៕ V / N
