អាម៉េរិកបន្តការបង្ហោះដ្រូនឈ្លបយកការណ៍នៅលើសមុទ្រខ្មៅក្រោយរុស្ស៊ីស្ទាក់
ប្រែសម្រួលៈបំណង(ដេល្លីម៉េល)៖ សហរដ្ឋអាម៉េរិកបានបន្តការបង្ហោះដ្រូនឈ្លបយកការណ៍លើតំបន់សមុទ្រខ្មៅឡើងវិញក្រោយការធ្លាក់ដ្រូនឈ្លបយកការណ៍របស់ខ្លួនមួយកាលពីថ្ងៃអង្គារចំពេលយន្តហោះប្រដេញរុស្ស៊ីស្ទាក់ផ្លូវ នេះបើតាមការអោយដឹងពីមន្ត្រីអាម៉េរិកពីរនាក់កាលពីថ្ងៃសុក្រ។ ពួកគេបាននិយាយថា ដ្រូនRQ-4 Global Hawkបានចេញបំពេញបេសកកម្មទៅកាន់តំបន់នោះកាលពីថ្ងៃសុក្រ និងមន្ត្រីម្នាក់បាននិយាយថាវាជាលើកដំបូងដែលមានការបង្ហោះដ្រូនទៅកាន់តំបន់សមុទ្រខ្មៅចាប់តាំងពីមានឧបទ្ទវហេតុកាលពីថ្ងៃអង្គារ។ ក្រុមមន្ត្រីក្រសួងការពារជាតិអាម៉េរិកបានអះអាងនៅសប្តាហ៍នេះថា ឧបទ្ទវហេតុធ្លាក់ដ្រូនMQ-9នោះនឹងមិននាំអោយរដ្ឋាភិបាលទីក្រុងវ៉ាស៊ីនតោនបញ្ឈប់បេសកកម្មដូច្នេះទេ។ ការស្ទាក់ផ្លូវនាំអោយធ្លាក់ដ្រូនរបស់កងទ័ពអាកាសអាម៉េរិកកាលពីថ្ងៃអង្គារជាហេតុការប្រឈមមុខផ្ទាល់រវាងរុស្ស៊ីនិងអាម៉េរិកជាលើកដំបូងចាប់តាំងពីសង្គ្រាមអ៊ុយក្រែនបានចាប់ផ្តើម ដោយវាកាន់តែធ្វើអោយទំនាក់ទំនងរវាងអាម៉េរិកនិងរុស្ស៊ីកាន់តែធ្លាក់ចុះដុនដាបទៅ។ រុស្ស៊ីបានបដិសេធការចោទប្រកាន់របស់អាម៉េរិកថាយន្តហោះSu-24 របស់ខ្លួនបានបុកដ្រូនMQ-9របស់អាម៉េរិកបណ្តាលអោយវាដាច់កង្ហារនិងធ្លាក់ចូលក្នុងសមុទ្រខ្មៅ ហើយផ្ទុយទៅវិញបន្ទោសលើដ្រូននោះដែលហោះ«បត់ឆែវខ្លាំងពេក»បណ្តាលអោយវាធ្លាក់។...