សំណាងណាស់ យន្តហោះចិនមួយឆេះម៉ាស៊ីនកំពុងហោះតែចុះចតគ្រាអាសន្នដោយសុវត្ថិភាពនៅសិង្ហបុរី (វីដេអូ)
ប្រែសម្រួលៈបំណង(ស្ត្រេតថែមស៍)៖ យន្តហោះនៃក្រុមហ៊ុនអាកាសចរណ៍ចិន Air Chinaមួយមកពីទីក្រុងឆឹងទូ(Chengdu)ក្នុងខេត្តស៊ីឈ័ន បានធ្វើការចុះចតគ្រាអាសន្ននៅសិង្ហបុរីកាលពីរសៀលថ្ងៃអាទិត្យក្រោយឆេះម៉ាស៊ីនឆ្វេង។ ហេតុការណ៍នេះបណ្តាលអោយផ្លូវយន្តហោះចុះឡើងមួយត្រូវបិទជិតបីម៉ោងនិងពន្យារជើងហោះហើរទាំងចូលមកនិងចាកចេញនៅអាកាសយានដ្ឋានឆាងហ្គី។ មនុស្សប្រាំបួននាក់នៅក្នុងយន្តហោះបានរងរបួសតិចតួចទាក់ទងនឹងការស្រូបផ្សែងចូលនិងរលាត់ស្បែកក្នុងអំឡុងពេលជម្លៀសខ្លួន ។ មានអ្នកដំណើរ១៤៦នាក់និងសមាជិកយន្តហោះប្រាំបួននាក់នៅក្នុងយន្តហោះពេលវាចេញពីអាកាសយានដ្ឋានអន្តរជាតិធីអានហ្វ៊ូ(Tianfu)នៅម៉ោង១១ព្រឹកនិងមកដល់អាកាសយានដ្ឋានឆាងហ្គី នៅម៉ោងប្រមាណ៤និង១៥នាទីរសៀល។ អាជ្ញាធរអាកាសចរណ៍ស៊ីវិលសិង្ហបុរីបាននិយាយថា ផ្លូវចុះឡើងយន្តហោះបានបិទជាបណ្តោះអាសន្ន តែបើកវិញនៅម៉ោង៧យប់។ យន្តហោះជើងហោះហើរCA403បានរាយការណ៍ថាមានផ្សែងហុយចេញពីកន្លែងដាក់ទំនិញនិងបន្ទប់ទឹកក្នុងពេលជិតចុះអាកាសយានដ្ឋានឆាងហ្គី និងបានប្រកាសស្ថានភាពគ្រាអាសន្នហើយស្នើសុំអាទិភាពចុះចតនៅម៉ោងប្រមាណ៣និង៥៩នាទី។...